Thursday, June 30, 2011

خربشة

كل يوم بنكتب كل يوم بنحكى كل يوم بنعمل حاجات كتير

حاجات ليها لازمه وحاجات ملهاش لازمه
حاجات بنعملها عشان محتاجينها وحاجات بنعملها عشان لازم تتعمل

اليوم بيعدى وآخره بنعد نقول لنفسنا عملنا ايه النهاردة
!!!!!
ومحدش بيبقى عارف الإجابة بتاعت حد
كل واحد فين بيجاوب عن نفسه

معرفش ايه فكرنى بالمدونة
يمكن المسابقة اللى هتتعمل بتاعت
مائة تدوينة فى كتاب

يمكن احساس التدوين يمكن الايام الحلوة بتاعت دون
واول كتاب وتالت كتاب
حفلات التوقيع
لقاء المدونين

ناس انا عرفتهم من اماكن كتير

المهم انا قلت اجى اطل واخربش واكتب اى حاجة فى المدونة
بدل ماهى بقت عاملة كدا

مفيش لاروح ولاحيوية

مقدرش اقول انا هرجع ادون تانى واقصد على بلوجر خصيصا
لأنى مازلت بكتب ع فيس بوك
وع كام مكان

مقدرش اقول نرجع ندون لأن اللى كانت بتدون هنا مش انا دى واحدة تانية
:)
كنتوا بخدعكم يمكن :D:D:D

فعلا كانت واحدة غيرى
يمكن اتطورت شخصيتى بسرعة اتغيرت اوى
يمكن مش قادرة ارجع ادون تانى هنا
وفى ذات الوقت مش قادرة اقفل المكان دا

يمكن عشان كل حاجة فى حياتنا بنتعلم منها
بتخلينا نعيش تجارب مختلفة

المدونة كانت ومازالت مكان كتبت فيه حاجات كتير عنى
وشهد تطورات عقلى

كتبت اول مرة عن احلامى
وشهدت تحقق احلامى دي
كتبت عن عشقى للسفر
وسجلت فيها سفرياتى
كتبت عن نظرتى لنفسى
وبدأت احققها


جيت اطل ع جدران المدونة
واقولها

لسه فاكر عم مينا بتاع الزمان
المقدس اللى كان بيفوت علينا بالأمان

وابتسم

واقولها
كوباية كوفى ميكس وكتاب اذاكر فيه وعقل مشغول انى هأنزل امتى اخر الاسبوع عشان اكتب تدوينة جديدة

واقولها
انا كبرت يامدونتى
العمر عدى
من 2007 لحد دلوقتى
اتعصرت فى الحياة

كان نفسى يامدونتى تفرح معايا فى فرحتى
بس معلش خليكى كدا شوية وانا هأظبطك :)

واقولها
انك كنتى سبب فى حاجات كتير حلوة
حاجات مكنتش اتخيل انها تحصلى اصلا
دلوقتى بقول ياااااااه معقول

وكنت برضه سبب فى حاجات تانية مكنتش بتاعتى

واقولها
انا لسه بسمع منير والعسيلى وبحب اناشيد حماس
لسه طفلة زى 2007
بس بعقل 2011 وقلب 2011
لسه ولاء اللى بتعشق الأقصى
بس من غير لقب عاشقة الأقصى


لسه احلامى بتتكبر اوى اوى
ولسه خايفه عليها
لسه بعمل انجازات
بس برضه لسه بخاف شويه

واقولها

الحب من شيم الكرام
وابتسم ابتسامة صغنتوتة
واقول يارب :)


واقولها
يااااااااه معقول يامدونتى كام يوم ويبقى عندك اربع سنين
تصدقى انا كنت نسيت
وانا بكتب دلوقتى افتكرت


واقولها
كبرت تغيرت

سافرت بلاد وشوفت ناس واتعلمت حاجات
مبقتش تابعة لحد ولا بسمع كلام حد من غير نقاش
ولا بقتنع بكلام حد كأنه وحى
يمكن بقى عيب انى بفكر كتير اوى اوى اوى لدرجة تخنق
لكن هى ميزة فى نفس الوقت


واقولها
انا بحب ولاء بتاعت دلوقتى اكتر
بحبها لأنها بقت مكتملة الروح
وان كانت لسه بتحاول تبقى اسعد واكثر انجازا

انا بحب ولاء اللى اتغيرت للأحسن

مش بكره ولاء بتاع زمان بس بستغربها
بحسها مكنتش انا ومش عارفة ليه
او يمكن دلوقتى هى اللى جديدة

مش هتفرق
ولاء دلوقتى اكثر اتزانا ونضج
واكثر رؤية لمستقبلها
:)

اقولها
ان العمر فات ياولدى
:)
بس لسه برضه فيه امل ان اللى جاى ننجز فيه اكتر

اقولها ياااااااااااه التدوين حلو لطيف بتغرد للناس كلها والناس كلها تقرأ وممكن تعدى متعلقش بس تعيش معاك القصة كأنها صاحبتها


عموما انا جيت اطل ع المدون
اطل طلة حد بيشتاق لجزء من عمره
واول مكان كلماته اتكتب فبيه

ازيك بقى
ارجعلك كمان كام يوم
احتفل بعيد ميلادك الرابع
:)

سلام يامدونتى