يانفسى وحشتينى

وحشتينى

وحشتينى وأسفى انا ليك

بقولك بجد وحشتينى

وحاسه بغربتى فيكى

ومش عارفه أدارى شوقى لعينيك

لقلبك حتى وملامحك

نسيت ضحكه اللؤلى

نسيت الفرحه فى عنيكى

وحشتينى

وأكتب ايه

وحلمى جوا احلامك

وجرحى جوه أيامك

بعدى عنى سبتينى

لاقيت المر فى بعادك

يانفسى

يلا صالحينى

وآمحى آلمى وأنينى

يانفسى نفسى الاقكى

لأنك انتى عرفنى

وعارفه ان احلامى

بحضن يسمع لكلامى

وقلب يحس الآمى

مهوش لازم

نلاقى القلب يسمعنا

وايه لو ننسى اوجاعنا

اهو احساس

وبرضه بقولك

يانفسى

وحشتينى

I have a dream

Martin Luther King "I have a dream

"

August,28 1963

http://www.youtube.com/watch?v=PbUtL_0vAJk

بدايه انا مش هأحلل الخطبه او هأعلق عليها

لكن هأقول ليكم خواطر مرت بداخلى عندما اتيحت لى الفرصه انى اشاهد فيديو الخطبه ديه

كنت بتفرج ع الخطبه عادى جدا

ولكن عنوانها هو اكتر شئ شدنى جدا

ازاى الراجل ده كان شايف حلمه قدامه واضح اوى

شايف ان السود فى يوم هيعيشوا مع البيض دون عنصريه

شايف ان حلمه هيتحقق

حتى لو مش دلوقتى

بيعلم الاجيال اللى جايه ان الحلم فى يوم هيتحقق

بس لو ركزنا عليه وعملنا ليه

وشوفوا بعد كام سنه اتحقق حلمه

وحكم امريكا

واحد من السود (أوباما)طب ليه انا بكتب كلامى ده

هل أنبهار بمارتن كينج

ولا ايه؟

اولا لنتفق انه قائد جمع حواليه محبيه على فكره

قائد قدر ازاى يحلم حلمه ويشوفوا كويس اوى

واتحقق حلمه

لكن أنا بس حبيت أوضح شئ

ان الناس ديه كانت بتحلم بفكره

بتعمل عشانها واتحققت

طب ما نرجع لينا بقى احنا

احنا معانا الحق وعارفين كده كويس

وفى فى الأسلام امثاله على كده كتير

رسولنا علمنا ازاى معنى القياده

فى مواقف كتير

وديننا ملئ بنماذج القياده

لكن الحكمه ضاله المؤمن

فلذا استعنت بالفيديو ده

انا اتكلمت عن الخطبه ديه دلوقتى

لان مثال أوباما واضح قدام الناس

يعنى الحلم

والحقيقه بتاعته

حلم مارتن والحقيقه فى أوباما

برضه لسه هدفى اليكم مش واضح اوضح اكتر

انا اكتر حاجه جالت بخاطرى

ان الواحد لازم يعيش لفكرته ويكون عندنا يقين فى تحقيقه

كتير مننا أحيانا بيصاب بفتور ومش هقول يأس

بيحس انه خلاص ضاع حلمه

وانا عن تجربه من فتره حسيت ان احد أحلامى كان هيضيع منى

لكن شاء ربنا ان يبين لى أشياء مكنتش شايفها

ومريت بتجربه جعلتنى أدافع عن حلمى أكتر من الاول اتمسك بيه أكتر

اعمل عشانه أكتر

كانت تجربه صعبه عليا كنفس بشريه

لكن اتعلمت

ياجماعه أحلامنا احنا اللى لازم نصنعاه ندافع عنها ونحولها لواقع ملموس مش نتركها فى عالم التمنى فقط

ياشباب احنا خير أمه أخرجت للناس

مينفعش نبقى ضايعين وتايهين

مينفعش نعيش بدون فكره نعمل عشانها وحلم يحرك الفكره ديه

تعالوا كلنا نقول

i have adream

على الهامش

اعذرونى بشده بعدم ردى وزيارتى لكل الناس اللى بتشرفنى بتعليقاتها

صدقا والله انا مطحونه جدا

ان شاء الله أرد على كل الناس وارجع اتواجد

ادعولى بس بشده

لكنها الحياه

حياتى

جميله مليئه بالحب والسعاده

حياتى

فى ذات الوقت فاقده لبعض الأشياء

حياتى

مختلفه ومتميزه ولكنها تؤلمنى بهذا التميز

حياتى

بالرغم من حسد الآخرين لى عليها الأ انها مغلقه عليا ولا يعلم عنها أحدا شئ
بالرغم من اعتقادهم فى صراحتها لهم

حياتى

ترنيمه ومقطوعه موسيسقه تحمل بداخلها الشجن فى أحيانا ليست بالقليله ولا بالكثيره

حياتى

كنت أتمنى فيها أشياء وشاء القدر ان لا تحدث لمنحه ستجئ يوما ما

حياتى

بالرغم من قسوتها عليا أحيانا أحبها

حياتى

بها الكثير وأنتظر أن أحقق فيها المزيد

حياتى

مضغوطه كثيرا ولكنها لاشئ بالنسبه ليا
عباره قد لايفهمها الا انا

حياتى

مهمه لآخرين ولكن ليس بالشكل الذى أرجو أن تكون عليه

حياتى

أحلام بعضها مؤجل وأحلام لن تؤجل وأحلام تحقق

حياتى

بها كثيرا من الأصحاب وكثيرا من العلاقات تضجج بالناس كأننى أعرف الجميع ولكنها تبحث عن شئ مفقود عن حضن أرمى بداخله همومى عن صديق دائم وحبيب لا يفارقنى وعون معى ومؤكد ليس لى سوى ربى قادر أن يبعث لى من يفهمنى


حياتى

حلمى أن تكون لله وكفى

حينها سيكون كل شئ فى الحياه هين مهما كان صعبا ولين مهما كان قاسى

ولكنها الحياه

وصل ياجدعان

السلام عليكم

افتقدتكم جدا وبشده الأيام اللى فاتت

صدقا وحشتينى المدونه وكما وحشنى متابعتى ليكم

مش عارفه أقولكم ايه بجد لكن انا تقريبا فى كليه العذاب الطبيعى

بقالى تقريبا من يوم السبت اللى فات ليوم الخميس كل يوم امتحان وايام امتحانين

عشر امتحانات فى سته أيام احساس رائع طبعا

مذاكره مذاكره مذاكره

لدرجه انى كرهت الكلمه نفسها هههههه

المهم ياجماعه طبعا انا كنت ناوى انى اقعد الأسبوع التالت للتوالى ف قاهره المعز

ولكن حدث هبوط اضطرارى

وكلها يركز اوى فى اللى جاى

لأن هناك حدث مهم فى حياتى

الأ وهو

وصول

القائد الهمام

معاذ علاء

ابن اختى المبجل

بعد تسعه أشهر حضرته قاعد جوه

طبعا كان لازم احضر اللحظه التاريخيه ديه

عشان

كلاكيت اول مره هأبقى خاله ياجدعان

ولازم برضه أبقى موجوده

سبت كل حاجه ونزلت طبعا

وع فكره انا عندى امتحان بكره

ودعواتكم بشده

وفيه خمسميه موضوع نفسى أكتبهم

نفسى أتابع الناس الحلوين اللى كنت بدخل عندهم

ولكن ليس كل ما يتمناه المرء يدركه

ان شاء الله على أمل العوده على الأقل أتابع أسبوعيا

وعايزه أسمع احلى تعظيم سلام لمعاذ

عشان لما يكبر اقولها المدونين والمدونات

عملولك احلى تشريفه

وبس وسلام عليكم

تساؤلات

السلام عليكم ورحمه الله وبركاته

تقريبا ايام وهبدأ ماراثون أمتحانات الميد تيرم

يعنى محتاجين دعوات كل المدونين

صراحه المواضيع اللى نفسى أتكلم فيها كتير وأفكارى متلخبطه جدا

لكن هأحاول اكتب شويه أشياء بجد محتاره فيها جدا

ليه احنا بنقصر فى أعمالنا وبنطلع لنفسنا أعذار؟ هل لضعف فى عزيمتنا ولا لاننا بنستهين بها وآيه حصل لينا

ليه احيانا بنحس ان احنا مضغوطيين اوى وان اللى احنا فيه احنا اقل منه بكتير ودا سؤال بجد نفسى حد يجاوب عليه الواحد ساعات بيخاف على نفسه يكون اى عمل بيعمله طريق لهلاكه بيخاف يكون بيعمل دون زاد حركه دون ايمان بجد ربنا يرزقنا الأخلاص؟

ليه أحلامنا اللى بنبنيها أحيانا بنحس ان فى ناس عايزه تهدمها بحجه انهم يرون مالا نراه او انهم أكبر مننا وأكثر مننا خبره ليه مش يدونا الفرصه نجرب ونحلم .بصراحه انا عن نفسى ممكن أدافع عن أحلامى بشراسه ولن يستطيع أحدا ان يهدمها أبدا بس هو مجرد سؤال؟

هل احنا حاسيين ان احنا سبب فى تأخر النصر؟ الفساد والانحلال بيزيد المعصيه بتزيد الحياء بيقل محتاجيين نشتغل بكل ما اؤتينا من قوه عشان الدين دا غالى اوى بس جاوبوا على السؤال؟

ياترى كل واحد فينا حقق آد أيه من مشروعه الشخصى حتى ولو قليل لما الواحد بيحقق حاجه ولو صغيره فى مشروعه بيفرح او دعواتكم لينا بقى؟

عايز أقول ان كنت بتكلم مع اخت اعرفها وكنا بنتكلم عن التدوين ومن ضمن الكلام انها قالتلى كلمه جميله اوى ان الواحد ممكن تفكيره يتغير بعد فتره طبعا للأفضل وينظر للى كان بيعملها قبل الفتره دى ايه اللى كنت بعمله ده؟

كلامه طبعا صح الفكر بينمو وبينضح لكن لما فكرت لقيت ان كل حاجه الواحد بيعمله مهما كانت تافهه فى نظر ناس تانيه هيا بتضيف على رصيده الحياتى كتير

كفايه تساؤلات ليكم

بتوحشنى المدونه جدا

بحاول أتابع لكن أعذرونى

لما بجى حد البيت

القائد نور الدين منورانا

وطبعا بقعد ألعب معاه

نسيت أقولكم

وجود نور الدين فى البيت رغم عدم تواجده ع طول عندنا

بيحسننا بقمه الفرح والسعاده

وطبعا وجود اخويا بيحسسنى بالامان وما أجمل هذا الاحساس

ان شاء الله احطلكوا صور نور الدين فى بوست بعد كده واكلمكم عنه

المهم لاتنسونا من الدعاء

ودمتم بخير