خلى الصور تتكلم لو عجر اللسان

حبيت ابدأ بالصوره اللى تحمل الف معنى جواها الطفل ده ابن احد المعتقلين الطفل ده قال كلمه هزت كل اللى كانوا واقفين لانه طالع شجاع مش بيخاف فى زمن بقينا عاوزين نمشى جوا الحيط انا مش هعلق تانى على الصور وخليها هيا تتكلم

فى النهايه انا بجد كان غصب عنى انى ما ادونش هذا الحدث فى يومها لكن والله ما مر بيه كان اصعب والحمد لله على كل شئ يوم المسيره بليل عرفت خبر وفاه عمى.بجد ياجماعه كان صعب اوى الفراق اصعب ما يكون ولكن انا فعلا مش عارفه اكتب ومش عارفه ادون لكن لازم اكتب ولو قليل

وكمان المحاكمه اتأجل النطق بالحكم

واحداث كتير حوالينا لكن هأحاول اكتب ولكن التمسوا لى العذر

عاشقه الاقصى

فكوا القيود

الثلاثاء القادم

يوم ننتظره ونحن جميعا لاندرى على ماذا سينتهى هل بفرحه تملئ قلب عائشه حسن مالك والزهراء خيرت الشاطر وساره بشر وكل ابناء المعتقلين.ام بماذا سينتهى؟؟

الثلاثاء القادم26\2\2008 النطق فى قضيه المحاكم العسكريه لأباءوأخوان كل فرد ينتمى لهذا الوطن الأبى اخوان وغير اخوان.اباء واخوان لنا يحملون انقى قلوب واطهر سيره واسمى اهداف نصبت لهم قوى البطش والقوه مهزله تسمى بالمحاكم العسكريه لا لشئ الا انهم يقولون ربى الله.فبأى ذنبا يحرم ابناءهم رغد العيش هل لانهم ابناء اشخاص باعوا ارواحهم لله والله اشترى.كل مايمكننى ان اقول انى اليوم ذكرتنى اخواتى فى الله بأن الثلاثاء القادم هو اليوم الفاصل وتواصينا أن نقيم فى كل ليله من اجل الدعاء لهم.مهما كان اتجاهاتكم ووجهاتكم .الا يستحق منكم شرفاء من ابناء تللك الامه ان تدعو لهم بأن يفك الله كربهم ؟وأن تيعد هذه الغمه عنا ونفرح بخروجهم وتفرح معنا عائشه حسن مالك والزهراء خيرت الشاطر وساره مجمد على بشر.من حقهم أن يفرحوا ولكن لا تبخلوا بالدعاء.

ولكن مهما تكالبت المحن عليكم نعلم انكم بأذن الله صامدين صابرين محتسبين كل يوم فى سبيل الله.

اقولهم لكم بأسم كل فتاه من فتيات تلك الدعوه المباركه والله لن يضيعكم الله مهما تكالبت المحن واشتدت الازمات.فعلوا بنا مافعلوا فى 56ومازالت دعوه الله قائمه اعتقلوا منا ما اعتقلوا ومازلنا على الخطى ولن نحنى بأذن الله.قال تعالى (ولاتهنوا ولا تحزنوا وانتم الاعلون.)اقولها لكل العالم مدويه لن نخافولن نتراجع فمهما طال ليل الظلم لابد ان ينقشع.

ولكن بالله عليكم جميعكم بشتى تياراتكم اجتمعوا على الدعاء لهم فى جوف الليل حتى تنازح تلك الغمه.

الله معكم

عاشقه الاقصى

اول تاج

سلام عليكم

دا اول تاج يجيلى والتاج اتمررلى من مدونه ادم المهدى

هأبدا ارد على الاسئله اللى فيه.

هل توافق على حزف خانة الديانة من البطاقة الشخصية
انتمائى للاسلام جزء لا يتجزأ من حياتى فاكيد فمينفعش احذف جزء منى والا مش هعرف اعيش
2
ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟
شئ مفيش كلمه تقدر توصفه.وشئنا ام ابينا فهمها ناس موجودين وسطنا لكنى ما اقدرش اوافق على حاجه اسلامى ينهى عنها.مش هنعترف بيهم بس هما موجودين ولازم نعمل حاجه تصلحهم لانهم مش مرضى هما ناس بعدت عن ربنا واستحلت ما حرمه الله

اكيد مليش اصدقاء كده

هل تعتقد بوجود إضطهاد للمسيحين فى مصر ؟

لا مفيش اضطهاد للمسيحين فى مصر واخدين كل حقوقهم بيعملوا حفلات فى الكنائس براحتهم وبيطلعوا رحلات تبع الكنائس وحاجات كتير لو احنا فكرنا نعملها بتبقى خطر على الامن القومى .وكل شويه يقولولنا فى اضطهاد ياريت نفكر هتعرفوا مين المضطهد بجد وبعدين لو فيه حالات اضطهاد فرديه فدا مش عشان هما نصارى بل عشان هو مواطن فى وطن يحكمه القوه والبطش
من هو الشخص الذى تختاره لرئاسة مصر ؟
اول مره اتسأل السؤال ده بس لولازم اجاوب

د\عصام العريان
أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟ هل توافق على مشاركة كل من : الإخوان المسلمين - الأقباط فى الحكم ؟
اكيد طبعا الاخوان هيشاركوا فيها والنصارى وكل الناس اللى هدفها الاول نهضه الوطن ده الوطن اللى بصراحه محتاج ناس تشيل همه وديه مش شعارات دا واقع ملموس هيشارك فيه شباب وصغيرين وناس كبيره

عشان يبقى عندنا حماس الشباب وخبره الكبار وبراءه الاطفال

عشان نقدر نحقق لكل حد متطلباته

محتاجين بجد نتعايش مع بعض ومش بس الاخوان واكيد السلفيين وكل صاحب فكر بيحب البلد ونتناسى المسميات ويكون هدفنا فكره الحق التليد.
6
فى رأيك الشخصى .. ما هى أفضل مدونة على بلوجر قمت بزيارتها ؟
افضل مدونه صعب الحصر

لكن لكل مدونه مذاق خاص

بس المدونه اللى بجد بحرص على متابعته ادم المهدى

اللى كانت السبب فى تدوينى

وعياش

وجيل الصحوه

وكل المدونات اللى انا بدخلها راااائعه جدا لكن دول اكتر مدونات اثرت فيا
7
للذكور فقط : أيهما تفضل كزوجة .. إمراءه عاملة ، أم ربة منزل ؟
اذا تزوجت وأنجبت ولدين وبنتين .. أى الأسماء تحب أن تسمى ؟
لو انجبت اربعه بس هنتفق مع بعض على الاسماء

بس بجد نفسى اسمى دارين على اسم الشهيده دارين ابو عيشه.و جويريه

والولاد

نضال وآدم

ملعش سبقنا ادم المهدى باختيار اسم ادم

لكن الاسماء متاحه للجميع

وانا ذكيه هاخلف لزوجى اربعه تانيين يسميوهم براحته يعنى انا اسمى واحده وهو التانى
9
هل تعتقد أن توريث الحكم فى مصر . . سيتم فعلا أم لا ؟
محدش عارف بكره مخبى ايه.هل اسوأ ام افضل
10
فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟

انجازات بصراحه احنا ممكن نقول تخريبات

اهم انجاز انه عمل فروق طبقيه عاليه جدا

شوفنا ازهى عصور الديمقراطيه يااااااااااااااااااه انتم بتتكلموا ازى

التعليم اللى كل يوم فى انحطاط

الجامعات اللى بقت بتشهد حفلات رقص

احنا هنقول ايه ولا ايه

يا جماعه احلى انجاز ان احنا مازلنا بنطلع نكت حتى لو متنا هنفضل شعب خفيف الدم

بس بصراحه فى انجاز حلو

المترو

هو طبعا معدش انجاز بس كان انجاز لفتره معينه بس هو ارحم وسيله مواصلات فى القاهره

اسوء حاجه ان فى ناس لسه مضحوك عليها ومعمول عليها تعتيم على عقولها.

امرر التاج لمين لمين لمين

لاول حد يقرا ردى

والله لو كان رد على تاج قبل كده يبقى تانى حد يقرأ الرد

استحملوا بقى اجاباتى

عاشقه الاقصى

النهارده للأسف الشديد وللمره الثانيه تنشر الصحف الدانماركيه الرسوم المسيئه لاشرف الخلق اجمعين.عذرا رسول نأسف رسول الله شعارات رددنها ونحن نبعد عنها بافعالنا اين نحن من رسول الله .ياجماعه الامر اكبر من اننا نشجب وندين بس اتحركوا امه بأكملها تهان واحنا السبب احنا اللى فضلنا نطأطى رأسنا لحد لما لمسنا الارض احنا اللى الذل ملنا والخوف مش احنا السبب برضه احنا اللى تركنا السنه وسمحنا لاخس الناس ان ترسم رسولنا لو كانوا روأ فى المسلمين قوه ما فعلوا هذا .احب اقول حاجه مهمه ايوم فينا خير فينا ركع سجود فينا ناس وبتحب ربنا لكن بجد اصحوا وفكروا هنعمل ايه لرسولنا الكريم علشان ندافع عنه انشروا الفكره نعمل جروبات نعمل مدونات نعمل ايه شى نستطيع ان احنا نعملها.مش عارفه اقول ايه ؟؟انا اسفه يارسولى انا غلطانه احنا اللى فعلنا كده فى امتنا

لازم نصحى بقى عشان منندماش ياجماعه دا رسولنا وشفيعنا واللى ضحى بعمره عشانا

شباب بيحلم ببكره

اوقات بيحس الانسان انه نفسه يتكلم عن حاجات كتير هو عايش ليه وعشان ايه وهل الاهداف اللى هو حاططها تناسبها وهل وهل؟وتلاقيها بيفكر فى ميت حاجه .وهو فين من احلامه فيه ناس بتقول ان الاحلام مش بتتحقق لكن الاهداف هيا اللى بتتحقق انا بقول ان الاحلام جزء من الاهداف.والحلم مهم اوى فى حياه اى انسان ولازم نفكر احنا ازاى ممكن نحقق احلامنا .لكم اننا منحلمش لو بطلنا نحلم نموت.وبجد ياجماعه اوقات الانسان بيبص للحياه يلاقى نفسه تايهه وكاره الحياه لكن اكيد الدنيا فيها حاجات تستحق ان احنا نحيى الحياه من اجلها.محتاجين نفكر فى مستقبلنا وحياتنا.محتاجين نصحى جوانا الانسان اللى مات من زمان.محتاجين نحس ببعض اكتر من كده للاسف اوقات الواحد مثلا يتخيل ان اللى قدامه ده حاسس بيه ويطلع العكس او يتعامل مع هذا الاحساس بقسوه شويه.مش معنى كده ان احنا ننهار لا لكن نحاول نحس ببعض اكتر مهما الناس ما فهمتناش .اكيد فيه ناس عندها احساس بالناس وبالحياه اكتر من كده الحياه محتاجه مننا ان احنا نتمتع بعاطفه العقل

مش نبقى بنتكلم بعقل اوى او نحكم المشاعر اوى نبقى وسط نعيش لا نجرح ولا نجرح بضم النون

محتاجه ممنا نكون احلى شباب شباب بيحلم ببكره عايش لفكره عايش لهدف.يمكن انا بكتب لبوست ده عشان اتخدى نفسى اللى كل شويه تزعل وتتضايق وتحس بانها بتتظلم من ناسا كتير.لكن انا مؤمنه بأنى انا بس اللى اقدر اخرج نفسى من الحاله ديه.لازم نفتكر احنا ليه عايشين نفتكر ان احنا لام انكون خطوه فى طريق النصر ونكون بجد ناس حاسه بالمسئوليه مش تايهين كل واحد فى الحياه ليه دور كبير ولازم يأثر فى المكان اللى هو فيه لازم يكون صاحب فكره .بجد تعالوا نبدأ نصحى الاحساس ده جوانا ان احنا نكون احلى شباب

شباب بيحلم ببكره وان شاء الله الحلم يتحقق عشان احنا ان شاء الله هنعيش الحلم ونحط اهدافنا وننجح بأذن الله

عايزه اقول حاجه مهمه اوى

انا فى كذا حد فى الفتره اللى فاتت عملوه حاجات جرحتنى او زعلتنى لكنى بقولهم لو قروأ كلامى

جزاكم الله خيرا لانكم خرجتونى من مود الحزن الى حالتى وطموحى تانى رغم انكم زعلتونى اوى لكن كنتم ممكن خرجتونى كده بطريقه تانيه

المهم

يلا نعيش احلى حياه مع احلى شباب بيحلم ببكره

واوعوا تنسوا فلسطين اوعوا تنسوا انها جزء من احلامنا اللى هتتحقق بأذن الله