Tuesday, January 11, 2011

لا أشخاص عندي نهائيين او مقدسين و ليست لدي قناعات نهائيه .. ما رأيك في هذه الجمله ؟ :)

لا اشخاص مقدسيين
نعم بالفعل

ولا قناعات نهائية
القناعات تتغير بعيدا عن الثوابت الاخلاقية مثلا والشرعية التى لامساس بها

ولااشخاص نهائيين
مش فاهمه يعنى ؟؟

Ask me anything

سؤال ....حضرتك بتقولي عامله إخفاء لناس كتيرة طيب ضفتيهم ليه من الاساس؟؟؟

مش عاملة لكتير اخفاء
عامله للبعض

فى وقت من الاوقات بتبقى مش قادر تتابع الكل والبعض لن يفيدك بشكل ما
ادا سبب
وأسباب آخرى احتفظ بيها لنفسى

ضيفتهم ليه
علشان فى ناس فى دائرة حياتك العلاقة الطيبة بيهم مهمة بس
:)

Ask me anything

Monday, January 10, 2011

بتحبي تسمعي محمد منير ؟؟ وليه ؟ :D :D

محدش بتسأله غيرى
:D;D:D
بحب اسمع منير طبعا وجدا
مش كل اغانى منير على فكرة فى اغانى مبسمعهاش

ليه
عشان الوحيد تقريبا اللى حتى لما بيغنى عاطفى مش بيبتذل المشاعر
كلمات لم اسمعها من قبل
غنا حقيقى الى الآن محدش قدر يعمل اغانى زيي اغانيه
وعلى فكرة انا مش مجنونة بيه كمغنى
انا مقدره لنوع من الفن والكلمات والتركيبات والتشبيهات والشعر والموسيقى
لم تتكرر الا فى تجارب قليلة

Ask me anything

تركيا ولا اسبانيا ؟ :))

مروحتش أسبانيا
:):)
بس أتمنى الذهااااااااااااب عاجلا غير آجل

ام تركيا فحقا حقا تاريخ عز بنى بجهد أجدادنا وطبيعة ساحرة تجعلك تظل طوال الوقت تسبح بحمد الله وقدرته وعظمته

مابين غذاء الروح وبين غذاء العزة
تركيا تجربة فريدة عشان الأكاديمية

فما بالك ان مزجت بجمال لتركيا مكانة خاصة

وأعتقد لما اروح اسبانيا هتكون تجربة خاصة آيضا

فى رأي ان تركيا واسبانيا وبلدان كثيرة استكمال لصورة الجمال المتكاملة
:)

Ask me anything

Sunday, January 9, 2011

إلى أين يتجه الطريق الذي تسيرين عليه ؟ والمحطة القادمة كيف ستكون ، القادمة مباشرة ؟

مابين ما أريد وما لا أريد
مابين ماأخطط له وبين مفآجات القدر لى

المحطة القادمة
فى مصر مش هأهاجر لسه :)
مع أحد أحلامى المستقبلة
بداية لتكوين قاعدة معلومات للإنطلاق فى تلك الحلم

محطة مهمة شهور وابدأ ان شاء الله
:):)

Ask me anything

ويل يا ويل .. ايه أكثر حاجة اتغيرت فيكي الفترة اللي فاتت ؟؟

بصى ياديدو فيه أكثر من حاجه
اتغيرت

اولها
عقلى وطريقة معالجتى للأمور والأفكار اللى جواه ونظرتى للحياة
بقى تفاؤل ممنهج

ثانيا
قلبى :)
راضية بجد جدا
ثالثا

علاقتى بالأصدقاء
الدائرة القريبة اتفلترت بشكل كبير

Ask me anything

Friday, January 7, 2011

بنخاف!!!


بنخاف من بكره ليه
مين عارف بكره ايه

الجملة دى كانت بتتقال فى تتر مسلسل بصراحة مش فاكره هو ايه بالظبط بس اهو كانت حلوة وخلاص

فعلا ساعات بنخاف بالرغم من اننا مش عارفين بكره حلوه ولا مر

بس يمكن بنخاف لنكون عيال ومنستحملوش لو مر او بنخاف نكون برضه عيال ومنستحملوش لو حلو بزياده

طول عمرى بكره الخوف مش بس بحب احس انى خايفه
مهما كان اللى بيحصل
مهما كانت الاحداث
مش بحب احس انى خايفه

حتى لو مش مطمئنه اوى وحتى لو احساس الامان منقوص
بحب اقول لنفسى متخافيش

حتى لو اى حاجة او كل حاجة
بقت صعبة
احيانا

حتى لو بقى فى مصطلحات فى الحياة بتخوف ومش بتطمن
لكن بقنعها انه لأ
دوونت وورى
:D
لكن اوقات بنخاف عشان بشر
بنخاف لأننا يمكن مش عاوزين نمشى من هنا
من الدنيا يعنى الا لما نعمل للبشرية دي حاجات كتير
او حاجات قليلة
بس نعمل حاجة مقتنعين بيها
حاجة توصل وتعيش وتستمر
حاجة محدش عملها زينا عشان احنا اصحاب الحاجة ديه
واصحاب البصمة ديه
بنخاف عشان بجد تعبنا م الفراق
ومش عاوزين نزود جرعة الحب للناس وتمشى من حياتنا

بنخاف للآسف
بنخاف على ومش بنخاف من
او على الاقل انا دايما بخاف على
بخاف على صورة لأحلامى رسمتها
يمكن الصورة مرة واحدة قامت مهزروزة وجالها زلازل ضيع رسومات كتير
بس حاولت ارجع الاقى الريشة وارسمها
بدأت ارسم عشان لو سبت الريشة هتنشف ومش هعرف ارسم تانى

بخاف اصدق كلامهم المحبط
اننا بنحلم واننا مدخلناش الواقع
بخاف على انى اطلع عيلة فى الآخر
ومستحملش ضريبة الحلم

بس رغم الخوف حاسه انه طبيعى حبه خوف يجيوا يخبطوا عليا
يمكن عشان اقوى الاساس اكتر
يمكن عشان افتح عنيا على احلامى اكتر
احميها اكتر
ادافع عنها اكتر
يمكن عشان اتأكد انى صح وان الاحباطات والكلام اللى شبها كله كلام لاقيمه له
فى نظرى على الاقل
يمكن اتأكد ان عشان عاوزين حاجة مختلفة هنعيش حياة مختلفة
يمكن عشان حاجات كتير

بس برغم خوفى حاسه بإنه مفيش حل غير الهروب إليه
الهروب إليه
اللى دايما بنهرب من خوفنا ليه
اللى دايما بنقعد نفضفض معاه بأحلامنا

ونقوله يارب بحلم أعمل كذا ويبقى شكله كذا ويطلع جميل ازاى
يارب نفسنا الأيام تعدى عشان ننجز حاجات ونكمل حاجات ونبدأ حاجات
يارب قلوبنا تعبتنا وانت اعلم بها فداويها من عندك
نقوله يارب مش خائفين من حد ولا حاجة
بس خايفين على حاجات نفسنا نعمل بيها حاجات ونيتنا انت عارفاه
نقوله يارب بنتوه من غيرك ومش بنعرف نكمل الطريق
وبنقع خليك معانا وحاوطنا بعينك وبرحمتك

وقتها فعلا بنحس بأمان
واحساس الأمان الغير مرتبط ببشر مرتبط برب البشر
وقتها ممكن نحاول منخافش
بل اكيد مش هنخاف

دا يصنف تحت بند
الهبل فى الجبل
حبه كلام جمب بعض جه على بالى اسجله واكتبه بس
:)