ما زال فى الامه نبض

السلام عليكم ورحمه الله وبركاته

مازال فى هذه الامه نبض

الكلمه ديه انا دايما بقولها

بقولها لانى مؤمنه بأن نصر ربنا هيجى لما ننتصر على أنفسنا

فى ناس كتير بتقول انى عايشه الدور مش مشكله عاجبنى وهأعيشه

اصلى مش جايب منهج من دماغى او من اى مكان المنهج دا منهج ربانى

ألا ان نصر الله قريب

وان تنصروا الله ينصركم

مش كل ديه ايات

ان الله لا يغير ما بقوم حتى يغيروا ما بأنفسهم

اكيد عمرنا ماهنتقدم ولا نتغير الا لما احنا من انفسنا نتغير

ونغير الكون حوالينا

اللى بيحصل من غلاء وفساد ونخلف ماهو الا نتاج عن حاجه واحده وهيا الخوف وعدم تحمل المسئوليه

وان احنا ارتضينا الذل

على فكره انا صعبان عليا اوى حالنا

لكن برجع واقول احنا السبب

زى ما كل واحد السبب فى اى شئ بيحصله

يعنى مثلا انا الايام اللى فاتت كان نفسيتى تعبانه جدا وكنت حاسه ان الدنيا كلها ضدى

او بمعنى ءاخر كدت انى اكرهه حاجات كتير حواليا المهم الحمد لله من الاسبوع اللى فات وانا بدات اخد بالى من نفسى وافكر ببساطه شويه بس انا اللى تعبت وانا برضه السبب فى ده ولما الواحد فرح وقرر انه يبقى بجد حد تانى وش الاحزان والاشياء اللى هتزعله وتخليه يعمل واجباته بلا روح قررت انى بجد اسيب الدنيا تمشى ببساطه

ولما اتقال ليه ان لازم الواحد يفكر ببساطه ومايحرقش نفسه فى التفكير كنت متخيله انه مينفعش لكن والله دا الصح

المشكله ان الواحد بيوجع وبيألم نفسه يعنى انا دلوقتى بكتب بالشمال اكتر لان اعصاب الجهه اليمين الله اعلم مالها فيها الم رهيب

بس انا السبب اكيد

بس والله انا الحمد لله بقالى اسبوع او اكتر فرحانه ونفسيتى تمام

بس الظاهر دى رواسب

المهم انا حبيت اضرب مثال على نفسى عشان ابين لكم اد ايه الواحد بيبقى هو فى النهايه السبب فى اللى بيحصلوها

لو الشعب فاق من اول ما الحكومه استبدت بالناس كان الوضع بقى مختلف

لكن كل واحد كان بيقول اهم حاجه لقمه العيش وادى لقمه العيش مش لاقينها هيعملوا ايه لسه برضه السكوت مستمر

انا لسه مؤمنه بأن الفجر جاي بس نغير انفسنا ونبدأ بتقوى الله

اكيد لما نبدأ بتقوى الله هنتغير ونقلب الكون كله ونخليه جنه فى الارض.

المهم نسيت اقول على حاجه مهمه اوى ان كل يوم الحكومه بتثبت للناس غباءها وللاسف كل يوم بيزودوا رصيد كره الناس ليهم

يعنى الفساد والظلم واستبداد

وكمان غباء

حلو اوى انهم يأجلوا المحاكمه العسكريه ليوم 15\4

يعنى بعد انتخابات المحليات بحوالى تسع ايام

بصراحه غباءهم فوق الحدود

والله يعملوا اللى هما عايزينه

الاخوان هيدخلوا الانتخابات شاءوا ام ابوا

لو اراد الله

وبعدين النظام اصبح مفلش مش عارف لو اتحكم فى القضيه هيحصل ايه

نظام جبان

لو كان عادل لحكم من زمان فى القضيه

لكن صبرا

احنا مش خايفين

اسر المعتقلين كلهم نحسبهم ولا نزكى على الله احدا

محتسبين

لكن لن تهنأ ايها الظالم

لن نسكت عن الظلم

وبجد ياريت الناس تفوق بقى عشان اللى بيحصل بقى كتير

انا من هنا بقولكم دعوه للتغيير

بجد حالنا مش هينصلح الا بالتغيير

حاجات كتير

جوه القلب ميت مليون موضوع اعمل ايه اكتب ايه؟

برضه ياقلبى مش عارفيييين



اكتب نصره لطفل فى غزه انعى الامه وكل الخونه

والا هاوفر صوتى لمحنه جايه اكيد من غير تفكير

ولا اسطر فوق كراستى دمعى على حال محفظتى والله تعبت من الطوابير

ولا انادى برفع المصحف لاجل ما ننصر اشرف مرسل للعالمين

ولا اذاكر لاجل ما ننجح فى الميد تيرم ياعينى عليه



والله تعبت ياقلبى والله ما عارفه اعمل ايه اكتب ايه

عايزه اخرج كل مافى واكتب باعلى الصوت اغنيه وافضل اغنى



بس الحاله بقت مش هيه

خليك عاقد جنب كتبنا نرجع تانى للميت ترم

يمكن تحصل حاجه تفرح وتشيل عننا الهم



ديه ياجماعه لا تقولوا عليها قصيده ولا زجل ولا اى حاجه من الفنون

دى كلمات طلعه فى لحظه والله ما تعرفوا فرحه ولا هم ولا من كتر اللى بيحصل المهم استحملوا بقى ذنبكم انكم بتدخلو المدونه دى



صدقا انا بشتاق جدا للتدوين ليكم بشتاق للمدونه وكل المدونات اللى بدخلها



يلا موسم امتحانات الميد تيرم هيبدأ عندنا الاسبوع اللى الجاى

وربنا بجد يستر



الترم عدى بسرعه اوى



تحياتى



عاشقه الاقصى

احمى بلدك

حملتنا حمله حمايه حمله كل مواطن بيحب الخير للناس
شبابنا بيضيع بسبب المخدرات فى ناس كتير بيوتها اتخربت فى اسر ضاعت بالله عليك كفايه سلبيه وشارك معانا فى الحمله
الحمله خمس اسابيع الاسبوع الاول عدا وكان واجبنا ان احنا نلصق البوسترات
وبالفعل بدأ الكل يتحرك ويلصق عندنا فى الكليه والشوارع وكل حته فى الوطن العربى مش مصر بس
تانى شئ الاسبوع التانى للحمله واللى المفروض نعمل 5000نشاط كحد ادنى
فى النوادى فى الجامعات على النت فى المساجد
ابدأ اتحركوا وقبل ما تتحركوا استشعروا قيمه اللى انتوا بتعملوا تخيلوا لو بسببك عرف واحد يروح يتعالج ويبدأ حياه جديده
دى النفس غاليه اوى عندى ربنا ومن احياها فكانما احيى الناس جميعا
بالله عليكم كونوا ايجابين
محتاجين جهودكم فى الاسبوع التانى

كل واحد عنده مدونه يكتب فيه عن الحمله
نعمل جروب على الفاس بوك
نتكلم كلمه فى السكشن عن المخدرات
فى المدرج

بين الطلاب
فى كل حته
نعمل ندوات فى مراكز الشباب والنوادى والمساجد نعمل خطب عن المخدرات

المخدرات خطر بيدق ابوابنا كلنا
رهاسيبكم مع فيديو هيفرق كتير معاكمhttp://www.amrkhaled.net/multimedia/multimedia1114.html.دى بروشور ممكن نطبعها ونوزعها على الناسhttp://www.2shared.com/file/2989815/b162ef...-montage-1.htmlhttp://www.2shared.com/file/2989830/f33e79...-montage-2.htmlhttp://www.2shared.com/file/2989832/1d3018...-montage-3.htmlhttp://www.2shared.com/file/2989836/1a5ddc...-montage-4.htmlيلا بقى ياشباب عايزين افكار وعايزين نشتغل بجد ونجدد العزم والنيه

يوم ما نبنى امتنا هيعود عزه امتنا

وهتعود اراضينا كلها

وهنعرف نرد على اللى سبوا نبينا

يلا احلموا ببكره وهنحقق احلامنا ان شاء الله

زمان وانا صغير

كانت فيه أغنيه زمان كده أيام الجاهليه .اسمها زمان وانا صغير كنت بحلم ابقى كبير تعب القلب واتحير من الدنيا ومن المشاوير.بجد والله ياجماعه كلنا واحنا صغيرين كنا بنحلم نكبر عشان نحس باستقلال فى فكرنا وتصرفتنا كلنا كنا بنحلم بكده.كلنا كنا حاسيين ان احنا هنكون فى عالم غير العالم كبرنا بقى.طب وبعد اما كبرنا ايه اللى حصل حد فيكم حس فى لحظه بمتعه انه كبر .حد بجد حس ان حياته كده احسن.بصراحه انا من رأيى ان الواحد عاش طفوله جميله اوى جربنا فيها كل حاجه.كانت بجد لحظات ممتعه كانت بجد لحظات كلها مرح وفرحه.بجد كفايه ان احنا مكنش بنحمل هم امتحانات الميد تيرم وامتحان الاناتومى العملى.المهم بجد يارفاق التدوين الطفوله كانت حلوه بس كلنا حلمنا ان احنا نكبر.انا واحده من الناس حاسه ان الحياه دلوقتى جميله اوى لاننا بدأنا نفهمه شويه صغيرين نفهم ايه اللى بيحصل.وبجد بقى عندنا حاجات بنعملها سواء فى الكليه او فى اى مكان تانى.الحياه اتغيرت وكبرت احلامنا معانا وبدأنا نحقق منها حاجات ولسه هنحقق.فى ناس هتقولى انتى شكلك رايقه وعايشه الدور ومش بتفرحى الا لما البلد تولع.استنوا بس ياجماعه هتقولولى الاسعار ناااااااااااااااااااار والدنيا قايمه عشان المحليات.عارفه والله بس صدقونى والله لازم نفوق من غفلتنا ونرجع نكمل مشوار النهضه من تانى اللى بدأناها مش كبرنا يبقى لازم نشتغل بجد فى كل حته احنا فيها لازم نشتغل ياريت كلنا نشتغل .لازم نحمل هم النهضه.والشغل رجع تانى للناس اللى بتحب حد يقولها اعملى حمله المخدرات حلقات الجنه فى بيوتنا.يلا همتكم بقى. مش بدأنا ان احنا كبرنا خلاص وكان نفسنا نكبر اشربوا بقى.بجد انا حاسه بسعاده وحاسه ان احنا لسه فينا امل مهما بيحصل فينا.سعيده بأننا كل يوم بنكبر وكل يوم بنتعلم تعبنا اه من المشاوير اتحيرنا لكن لازم نحس بمتعه ان احنا اصبحنا ناس ممكن تأثر فى امه.رب همه احيت امه.بلاش نفضل نرجع بالزمان لان الزمن عمره ماهيرجع.انا مره كنت بكلم دكتوره عندنا فى الكليه وقالتلى كلمه عمرى ما هنسأها.قالتلى ليه عايزين حد يولعلنا شمعه عشان نمشى فى الطريق لازم نعتمد على نفسنا بقى.كبرنا وهنكبر وياريت كلنا نكون بنكبر فى طاعه الله ياريت كلنا نكون من صتاع النهضه.ياجماعه حلو نفتكر اللى فات فى طفولتنا بس مش هنفضل نعيش فى الماضى الحاضر اكيد هيبقى فيه اللى يخليه احلى

حبه امل وحبه تفاؤل بقى

فى ايام اليأس بيتوزع مجانا مع الفول

المهم زمان وانا صغير كنت بحلم ابقى كبير

وانا فرحانه بالحلم ده

مهما تعبنا ومهما قابلنا

هتفضل كل مرحله ليه ذكريتها

فى رعايه الله

عاشقه الاقصى

خواطر

انا بقالى كتير ما كتبتش بس انا كنت بدخل المدونه ومتابعه الدنيا.بس بجد الواحد كل يوم بيتعلم فى الدنيا حاجات كتير.طبعا هتقولوا ايه الحكم اللى نزله عليه ديه.صدقا كل يوم بنتعلم حاجات كتير.النهارده انا جايه اكتب خواطر ممكن تكون مش على حاجه واحده لكن اهيه خواطر.

احيانا بنحس ان احنا لينا دور كبير اوى فى الحياه لازم نتعب ونجتهد عشان نحققوا واحيانا نحس بالملل والفتور.وجوه الاحساس ده تلاقى ناس طلعه من وسط الغمام جايه مد ليك الايد كتير بنحس الاحساس ده بس بنلاقى ناس بتحبنا دايما جنبنا.اصل الناس انواع ناس تبنى وناس تهدم وناس بتقعد تتفرج عليك وانت ضايع.دايما بسأل نفسى ياترى الدنيا ممكن تقف عشان صديق ضاع او عشان حد كنا بنحبه اوى وسابنا اواى نوع من انواع الفراق.لقيت اجابه جامده اوى .يستحيل الدنيا هتقف على حد.بس رجعت اسأل نفسى ازاى وكل واحد لينا ليه دور فى الحياه سواء مع الناس مع المجتمع او الخ.لقيت الاجابه واضحه برضه.ان احنا بنبقى شايفين اللى احنا عايزين نشوفه وحاسيين انه هو الخير لكن المقياس الالهى غيرنا تماما. وموضوع ان لكل واحد دور لازم يعمله اكيد صح لكن لو ما عملش الدور ده ربنا هيستبدله بالللى يعمله احسن منه.وبرجع اسأل نفسى ليه بنتصور ان الحياه صعبه ونقعد نبكى على ضياع اي شئ فيها فى حين ممكن يكون الاشياء اللى بنبكى من اجلها تكون اصلا فى وادى واحنا فى وادى.لازم يكون عندنا يقين ان اللى ربنا وضعنا فيه هوالافضل لينا حتى لو كان الظاهر لينا انه مش حاجه كويسه.اما احيانا اخرى بنبقى ضحايا او بمعنى اصح بنعطى من لايستحق صدقا يا جماعه كم واحد وواحده فينا اده اشياء كتير بغباء او بثقه زياده عن اللزوم مش برضه لازم نتعلم ان احنا نفكر شويه ونتحكم فى سيستم حياتنا اكيد فى اوقات بتحس بندم على حاجات كتير لكن برضه بنحس ان احنا كنا لازم نعمل كده مهما اللى قدمنا تناسى اى شئ .وانا فى طريقى للكليه النهارده لقيت لوحه مكتوب عليها الاحساس نعمه.كم واحد فينا حس ان الاحساس فعلا نعمه والله يا جماعه انك تحس بالناس ديه نعمه كبيره جدا انك تقدر اللى قدامك وتقدر شعوره وكل شئ هو حاسس بيه دى نعمه انك لما تشوف موقف مؤثر تبكى اكيد نعمه.لو تشوف الدموع فى عيون حد وتحس احساسه ده نعمه.لو حد يعطيك مشاعر وتحس بيها ديه نعمه الاحساس والمشاعر مش بس في قصص الحب لا الاحساس فى كل شئ الاحساس فعلا نعمه.ساعات يا جماعه بنمسك القلم وما نعرفش حتى نكتب اللى احنا عايزينه تفتكروا ليه؟. خواطر كتير فى بالى لكن كلها تتنازع للخروج لكن كفايه النهارده كده واقولكم اتركوا لافكاركم العنان اول ما تحب تخرج لان مش دايما هتخرج للنور,ممكن ساعات تغيب عنكم

عاشقه الاقصى...

اغيثوا غزه

الله اكبر ولله الحمد

هكذا ابتدات المسيره الحاشده لطلاب جامعه القاهره من كل التيارات

وليس الاخوان المسلمين وحدهم

مسيرتنا كانت من أجل اطفال بتموت وامه بستغيث مليون ونص من البشر قبل اى شى مليون ونص من المسلمين والعرب

نكتب ايه ولا ايه الناس هناك مش لاقيين اى شئ واحنا هنا قاعدين مرفهين مهما كنا عندنا اساسيات الحياه مش مشكله مين يموت ومين يعيش

ياجماعه انا بكتب بجد والذل المهانه فى وجوهنا كلنا هنقول ايه لربنا

هنقول ايه ودم محمد برعى لسه على ارض غزه كفايا ذل ومهانه بقى اتحركوا اتحركوا

والسؤال المعتاد هنعمل ايه

قاااااااااااااااااااااااااااااااااااطع مش قادر تقاطع خايف على نفسك تغيير نوع المشروب بتاعك بنتكلم فى كماليات وناس بتموت

تبرع من مالك لازم نتبرع ياجماعه ولو بالقليل شوف كام جنيه ممكن يضيع فى خروجه تبرع بحبه حتى من الكتير اللى بيضيع

الدعاااااااااااااء مهم جدا

شارك فى مسيره فى مؤتمر فى اى تجمع لنصره الناس دى

انشر القضيه رسايل موبايل على ايميلك بين اصحابك

علق ملصقات فى مدخل بيتك

انقذ الناس ديه فى ايديك كتير اهو

اتحركوا بقى كفايه كلام

انا مش هكتب واقول الوضع ايه لانه اصعب من انه يتيخيل

والصور ديه للمسيره الحاضده لطلاب جامعه القاهر من اجل غزه واللى اختتمت بمؤتمر حاشد لمختلف التيارات فى الجامعه من طلاب الاخوان والاشتراكيين وطلاب حزب العمل الاسلامى وحزب الغد

وكل الناس ديه قالت كلمات فى المؤتمر وبجد

الاقصى وغزه وكل فلسطين فى خطر

بالله عليكم اغيثوا غزه