بنخاف من بكره ليه
مين عارف بكره ايه
الجملة دى كانت بتتقال فى تتر مسلسل بصراحة مش فاكره هو ايه بالظبط بس اهو كانت حلوة وخلاص
فعلا ساعات بنخاف بالرغم من اننا مش عارفين بكره حلوه ولا مر
بس يمكن بنخاف لنكون عيال ومنستحملوش لو مر او بنخاف نكون برضه عيال ومنستحملوش لو حلو بزياده
طول عمرى بكره الخوف مش بس بحب احس انى خايفه
مهما كان اللى بيحصل
مهما كانت الاحداث
مش بحب احس انى خايفه
حتى لو مش مطمئنه اوى وحتى لو احساس الامان منقوص
بحب اقول لنفسى متخافيش
حتى لو اى حاجة او كل حاجة
بقت صعبة
احيانا
حتى لو بقى فى مصطلحات فى الحياة بتخوف ومش بتطمن
لكن بقنعها انه لأ
دوونت وورى
:D
لكن اوقات بنخاف عشان بشر
بنخاف لأننا يمكن مش عاوزين نمشى من هنا
من الدنيا يعنى الا لما نعمل للبشرية دي حاجات كتير
او حاجات قليلة
بس نعمل حاجة مقتنعين بيها
حاجة توصل وتعيش وتستمر
حاجة محدش عملها زينا عشان احنا اصحاب الحاجة ديه
واصحاب البصمة ديه
بنخاف عشان بجد تعبنا م الفراق
ومش عاوزين نزود جرعة الحب للناس وتمشى من حياتنا
بنخاف للآسف
بنخاف على ومش بنخاف من
او على الاقل انا دايما بخاف على
بخاف على صورة لأحلامى رسمتها
يمكن الصورة مرة واحدة قامت مهزروزة وجالها زلازل ضيع رسومات كتير
بس حاولت ارجع الاقى الريشة وارسمها
بدأت ارسم عشان لو سبت الريشة هتنشف ومش هعرف ارسم تانى
بخاف اصدق كلامهم المحبط
اننا بنحلم واننا مدخلناش الواقع
بخاف على انى اطلع عيلة فى الآخر
ومستحملش ضريبة الحلم
بس رغم الخوف حاسه انه طبيعى حبه خوف يجيوا يخبطوا عليا
يمكن عشان اقوى الاساس اكتر
يمكن عشان افتح عنيا على احلامى اكتر
احميها اكتر
ادافع عنها اكتر
يمكن عشان اتأكد انى صح وان الاحباطات والكلام اللى شبها كله كلام لاقيمه له
فى نظرى على الاقل
يمكن اتأكد ان عشان عاوزين حاجة مختلفة هنعيش حياة مختلفة
يمكن عشان حاجات كتير
بس برغم خوفى حاسه بإنه مفيش حل غير الهروب إليه
الهروب إليه
اللى دايما بنهرب من خوفنا ليه
اللى دايما بنقعد نفضفض معاه بأحلامنا
ونقوله يارب بحلم أعمل كذا ويبقى شكله كذا ويطلع جميل ازاى
يارب نفسنا الأيام تعدى عشان ننجز حاجات ونكمل حاجات ونبدأ حاجات
يارب قلوبنا تعبتنا وانت اعلم بها فداويها من عندك
نقوله يارب مش خائفين من حد ولا حاجة
بس خايفين على حاجات نفسنا نعمل بيها حاجات ونيتنا انت عارفاه
نقوله يارب بنتوه من غيرك ومش بنعرف نكمل الطريق
وبنقع خليك معانا وحاوطنا بعينك وبرحمتك
وقتها فعلا بنحس بأمان
واحساس الأمان الغير مرتبط ببشر مرتبط برب البشر
وقتها ممكن نحاول منخافش
بل اكيد مش هنخاف
دا يصنف تحت بند
الهبل فى الجبل
حبه كلام جمب بعض جه على بالى اسجله واكتبه بس
:)
4 comments:
بس خايفين على حاجات نفسنا نعمل بيها حاجات ونيتنا انت عارفها
-------
و الله لو ده الهبل في الجبل فياريت تكتري منه شوية
:D:D:D:D
انا بخاف و مش بتكسف اني اقول اني بخاف
بخاف من حاجات وبخاف من اشخاص
بس صدقيني كل الخوف ده بيبقى عشان الحاجات اللي نفسنا نعملها
بجد كلمتك اللي فوق دي بتلخص كل حاجة
عبد الرحمن عياش@
خلاص نستمر فى مسلسل الهبل فى الجبل
طالما عجبكم
:)
جميل الاعتراف بالخوف
يمكن بيبقى اول طريق اننا نتمسك باللى خايفين عليه
وفعلا لو معندناش حاجات نفسنا نعملها
مكنش فرق معانا اى حاجة
هتبقى الدنيا كده وخلاص
وحتى وقتها ممكن نبقى خايفين بس على حاجات بلا قيمة
نورت المدونة والله
:D الله يعمر بيتك يا فندم
الله يعمر مدونتك يعني
:D :D
انا شخصيا مش خايف اوي اوي من حاجات كتير كنت بخاف منها
ممكن لأني اقتنعت انه فعلا ربنا مش هيسيب حد عاوز يحقق حاجة في حياته من غير ما يواسيه بشوية حاجات .. ممكن الحاجات اللي انا خايف تضيع دي تكون منها
بس تعرفي يا دكتورة
الخوف فعلا في اوقات كتير اوي بيبقى دافع اكتر منه حاجة محبطة او مثبطة
الخوف بيطلع ادرينالين
الخوف بيخللينا نعمل حاجات مجنونةاوي مكناش هنعملها لو مكناش حاسين بالتهديد
الخوف مفيد .. احسن بكتير اوي من الاطمئنان :)
و ان كانت الراحة النفسية ممكن تيجي مع الخوف .. اقصد يعني اكون خايف و مرتاح في نفس الوقت ... لو ده حصل ... دي هتبقى احسن راحة في الدنيا !
:) دايما كانوا السلف بيقولوا "قلوبنا معلقة بين الخوف و الرجاء" .. بين اني مرعوب .. و بين اني مليان أمل
LIKEEEEE
على التعليق بجد
مابين الخوف والرجاء
المعادلة مش سهلة بحسها محتاجه تدريب جدا
محتاجة قلب متصل اصلا بالمنبع الروحانى لكونه يبقى مابين الخوف والرجاء
ومفهوم الخوف نفسه
ولكن للامان لذة
ربما لن تتحقق كاملة ف الدنيا
لكن مؤكد هتتحقق
ويظل خوفنا احنا وحدنا اللى ممكن نترجمه ونستغله ونتعامل معاه
Post a Comment