ماذا بعد؟؟؟؟؟؟؟

السلام عليكم

طبعا كبدايه لا يعتقد احد من البشر انى خلصت امتحانات لا سمح الله الحمد لله انا أرفع شعار مطحون مطحون مطحون ياولدى

بأذن الله هأخلص يوم الخميس بعد عناء وتعب ومذاكره من زماااااان وانا بمتحن الحمد لله على كل شئ


نسالكم بقى الدعاء يوم الاحد فى ماده حبيبه الى قلبى والواحد نفسه يجيب تقدير ندخل بقى عل المفيد

الفتره اللى فاتت كانت فتره عصيبه جدا

فتره عصيبه على الامه كلها وفتره عصيبه عليا شخصيا

كان نفسى صدقا أكتب وأتابع أكثر ربما تابعت الكثير والكثير عن مايحدث فى غزه لكن صدقا مكنتش بقدر أكتب اى حاجه اى حاجه

كان أحساسى ان مش عارفه لا أجمع أفكارى ولا أكتب كنت غالبا لما كنت تلح عليه نفسى انى اكتب كنت بكتب ع الورق

ولكن جئت النهارده عشان أقول لكم عن أشياء مهمه

فى زياره فريق أصدقاء لجنه الاغاثه لمستشفى الهلال الأحمر

كانت هناك حالات كتير صدقا لم أتخيل ازاى الواحد استحمل انه يرى الحالات ديه دون أن ينهار

ولكن الأشياء اللى لفتت نظرى

قوه وتماسك وصبر معظم المرضى ايمانهم الشديد بالنصر وايمانهم بان ماحدث ماهو الا منحه ربانيه

كانت العزه تخرج من عيونهم والله صدقا وليس مبالغه

معظهم كان ماشاء الله عليهم احنا بالنسبه لهم احنا اللى نحتاج حد يزورنا ويدعمنا

ام هم فالعزه فى اعيهم وفى كلامهم

كانوا سعداء جدا بينا

لدرجه انى مكنتش نفسى امشى واسيبهم

كنا بنلح عليهم جدا لكى يطلبوا اى طلب وكان كتير بيرفضوا نهائيا وآخرون بعد الحاح شديد

واحد منهم شاب صغير قالنا أنا هطلب منكم تلات طلبات شديده اوى تقدروا قولنا ليه ان شاء الله

قالنا
1 تدعولى فى كل صلاه
2 تتدعولى وانتم بتصلوا قيام الليل
3-تتصلوا تتطمنوا عليا

شوفتوا قالنا آيه

هذا الجريح اللى فى نظرى بطل يستحق ان كلنا نرفع ليه القبعه احتراما

رجليه الاتنين مبتورين وعلى ما أذكر ودراع كمان مبتور

ولو رأيتوا هذا البطل هتعرفوا يعنى آيه كلمه الصبر المتمثله فى ابتسامته التى لاتفارقه

الحكاوى كتير عن الجرحى لكن دى أكتر حاجه أثرت فيا

ياجماعه القضيه مش عاوزينها تتنسى بوقف أطلاق النار

غزه تحتاج جهودنا بجد تحتاح ان احنا نفكر ازاى ننصرها بكل مااؤتينا من قوه

لن أطل عليكم

واسألكم الدعاء وبشده يوم الاحد الساعه اتنين ظهرا بتوقيت القاهره

بس الله يكرمكم ادعوا باخلاص شويه عشان انها البيو كيمسترى

والله المستعان