كلام كتير جوايا

السلام عليكم ورحمه الله وبركاته

الحمد لله عدت الى مدينتى الجميله وتركت مدينه السحر على أمل العوده مره تانيه اليها ويمكن تبقى المره الجايه الزياره مختلفه
فوجئت من كام يوم بأعتقال المدونين عبد الرحمن عياش و مجدى سعد من المطار وطبعا لان هذا هو نظامنا المستبد فلا تعليق لأنى صراحه مش عارفه الاقى تعليق او تضامن أكتبه ليهم او أعلق على اللى حصلهم
لانى الوضع أصبح غير قابل الا للفعل والى الآن برضه لاتعليق

وفجر نفس اليوم اعتقل احمد ابو خليل من منزله 2 فجرا كعاده هذه النظاام

طبعا كلامى ليس تضامن لأن الدنيا كلها كاتبه تضامن بالكلمات لكن تذكره لينا ان احنا ندعى لهم وندعى لكل سجناء الرآى وكل أخواننا المعتقلين
لأننا كلنا مسجونين فى سجن كبير أصلا
..........................

طبعا عيد ميلاد مدونتى التانى عدى من غير ما أجيبلها تورته
بس مش مشكله

هيا تورتها انا وهي تورتى واحنا اصحاب مع بعض ومش هتفرق الشكليات

المهم

انى بجد بعتذر عن التقصير الفظييع المريع فى حق اخوانا المدونين والمدونات

اولا انا اصلا كنت جايلى حاله حياه فى الغيبوبه كده وكنت تقريبا واحده تانيه وكل يوم كنت بحاله
وتقريبا نقدر نقول انى مكنتش بلاقى كلام أكتبه
كثيرا ما كنت بقرأ موضوعات ومش أرد

طبعا مش رخامه لكن معرفش
المهم اهيه أيام وعدت

ورجعت ليكم ويارب تكون بدايه السنه التالته للتدوين بدايه كما أتمنى

عاوزه أقولكم ان العالم التدوينى غالى عندى بشكل غير طبيعى لأنه فيه ذكريات أحبها جدا جدا جدا

فيه عرفت ناس حفرت فى قلبى لهم مكان
فيه عرفت اعرف اغير من نفسى
فيه بكيت وفرحت وكتبت وعملت كل حاجه

عوضنى غربه نفسيه كنت بعيشها وكثيرا ما بعيشها رغم الزخم اللى فى حياتى من الأحداث اليوميه

بجد التدوين ليس مجرد مصدر للفضفضه او الكتابه

بل هو مصدر أتنسم فيه عطر مخملى فى شموع حمراء تطفو فوق مياه تروى ظمئى

واى خدمه يعنى

فربنا يجعلنى أكمل فى طريقى التدوينى

طبعا انتوا ممكن تكونوا زهقتوا من كلامى

بس معلش استحملونا بقى

ممكن أقول شويه رسايل على الماشى
رساله أول مره أكتب فى حياتى

رغم اشتياقى لسجده على أرض المسجد الأقصى

أشتاق بشده لسجده فى الروضه الشريفه

هو فيه حلين دلوقتى

اما حد يطلعنى عمره هديه
يا اما تدعولى اطلع عمره قريب
وربنا يستر ومتبقاش عمره لطره ولا حاجه

رساله تانيه

لولاء
(على فكره دا أنا)
لا تعولى على الأشخاص تانى عشان زهقتينى وقرفتينى وشكلى هأستعمل معاكى العنف وبعدين انتى هتبقى قاسيه اووى لو قعدتى تنتظرى منهم اللى يستحيل هيرجع تانى ممكن ترحمينا يا حاجه بقى عشان هما بقى ليهم حياتهم وانتى لازم يبقى ليكى حياتك
شوفتونى وانا رقيقه مع نفسى

رساله تالته
للدنيا اللى حواليه

انا بحبك جدا ومتقبلكى جدا بس نفسى تفهمينى انتى مالك عامله كده ليه احيانا بحس معاكى بالجنون والانطلاق واحيانا بتبقى غريبه عنى ولا يمكن انا اللى غريبه عنك مش عارفه
يمكن انا بعيشك غلط ولا لأ هما اللى مش فاهمين عموما انا بدأت أحاول أحاول احاول ولما نشوف آخرتها آيه معاكى

رساله رابعه

..........................................................................................................................

تبقى الفراغات تعبر عن حالتى

هما عارفين نفسهم دى لغه جديده انا اخترعتها كل لما اكون عاوزه اقول حاجه ومحدش يفهم ولا انا أفهم هأكتب كده

هذا نوع من جنون الروح

رساله خامسه
لأبى

وحشتينى
اووووووووووووووووووووووووووووووووى
عارف مقدار الدلع اللى ادلعته منك مخزونه قرب يخلص ويارب نلاقى حد يعمل اللى كنت بتعمله ويستحملنى
يحسن والله يا بابا انت كان قلبك كبير وشايل وساكت ومستحمل دلعى

رساله سادسه الى

الطفله بداخلى

وجودك سر حياتى أرجوكى اوعى تمشى وتسيبينى هأتعب من غيرك

بفى رساله آخيره بقى
انا عارفه ان صاحبتها مش هتقراها
بس بجد الرساله دى لأمى

بجد انتى ما تبقى من النبع الصافى للحنان والحب وبجد بتخافى عليا اوى
يمكن بنختلف بس والله ياماما محدش بيحبنى قدك

وكمان ظبطتينى فى اسكندريه ولازم اقول كلمتين حلوين فى حقك
بجد ماما هى القلب اللى مهما يقسى عليك لحظه يفضل يديك سنين ربنا يهدينى ليكى
وترضى عنى وانجح عشان خاطرك وخاطر دعوتى
دعواتكم معانا بقى

طبعا فى نهايه حلقه اليوم من الكلام الكتير ده

ادعولى كتييييييييييييييييييييييييييييييييير عشان نتيجتنا فى مرحله التخليل ولسه داخله على مرحله التحنيط
نسيت اقولكم اخويا وخطيبته نجحوا واخدوا بكالوريس التجاره شعبه محاسبه ويارب عقبال ما افرح بيهم فى الزفاف
ماما بتقولهم ياريتنى خليتكوا تتخطبوا من زمان
نصيحه اخويه اى حد نفسه يخطب وهو فى الدراسه مش يستنى بس اهم حاجه يشوفلوا اى شغلناه ان شاء الله يشتغل نفسه

وعقبالكم كلكم تخلصوا ونفرح بيكم وعقبال نجاحى الباهر الساحق ياااااااااااب

عاوزين حاجه

سلام عليكم