حاجات نفسى اعرفها؟

نفسى أعرف الرصيد بيروح فين

نفسى أعرف انا مش بدخل الماسنجر اون لاين ليه ؟او دلوقتى مبقتش بدخل أصلا الا نادرا ليه

نفسى أعرف ليه الناس بتتعامل تبع الشخص اللى قدامها مش تبع شخصيتها ومثال على ده الإنفتاح فى العلاقات الإنسانيه بين الولاد والبنات على النت

نفسى أعرف إحنا ليه بنستورد الكآبه والحزن وبنصدرهم كمان وكل ما نفرح نحس إننا هنزعل كمان شويه ؟

نفسى أعرف أنا ليه مش بمسك الموبايل وأرن على اصحابى زى زمان وابعت مسجات بقى والكلام الكبير ده .حتى لما بيبقى معايا رصيد عشان محدش يقولى انتى دايما مخلص الرصيد .مش ببقى حاطه فى حياتى انى أعمل كده.ودا طبعا مش لانهم مش مهمين بجد انا اصحابى بحبهم جدا وبحاول أسال على معظمهم لكن بجد أنا مقصره فى حق ناس كتير مش موجودين على النت للأسف؟

نفسى أعرف احنا ليه ممكن نشيل من بعض ونحقد على بعض وبجد بتبان اوى فى مجتمع البنات .ليه أصلا مش مؤمنين ان كل واحد فيه حاجات جميله جدا مش عند حد . بطلوا حقد طبقى يابنات عشان خنقتونى اولله ومش جايبن ورا غير كده ؟

.

نفسى أعرف وبجد بابا كان جايب كمية الطيبه اللى كانت عنده ديه ازاى ومنين ؟؟ والحب والوفاء والجمال والعطاء اللامحدود اللى نفسى اعرف فعلا جابوا منين؟؟؟؟؟؟؟؟؟؟

نفسى أعرف ليه دائما وأبدا انا وماما مختلفين حتى لو متفقين رغم اننا يسود بيننا حالة من السلام (ديه انا عارفها بس بستهبل

)

نفسى اعرف انا مش بنام بدرى ليه وحتى لو نمت بدرى مش بعرف أصحى بدرى غير لو ورايا حاجه مهمه لازم انزل منها من البيت ولو صحيت بدرى وقعدت فى البيت بنام تانى ومحدش يقولى حاولى لانى حاولت وتقريبا انا اتحولت كائن ليلى

نفسى أعرف الناس اللى مش مؤمنه بالحب وبتقول عليه اوهام حتى لو فى طريق صح ونور دى عايشه ازاى؟ومستحمله نفسها ازاى ؟؟؟

نفسى أعرف انا كنت بحب الطماطم وأنا صغيره ليه وكنت باكل كميات رهيبه منها ومن الخيار والخس

تقريبا كنت مشروع أرنب :)ومحدش يتريق لو سمحتم نهائى

نفسى أعرف أحوش عشان انا عاوزه احوش مش عشان ورايا حاجه عاوزه أجيبها

نفسى أعرف ماما بتكره الكمبيوتر ليه ونفسها انهارده قبل بكره يفصلوا النت من مصر كلها رغم انى فعلا مش بقعد عليه قدامها كتير

ومن أجل هذا رغبتها فى شراء لاب ليه شبه مهزوزه للغايه الا مره واحده أقرت انها هتجيبلى بس مكنتش قدامى

نفسى أعرف أنا طيبه ولا شريره ولأ مجنونه ولأعاقله وليه ساعات لما ببقى متضايقه ممكن أولع فى اى حاجه قدامى حسب توصيف اختى وليه لما بحب بحب اوى وليه مش بعرف اكره بجد والله مش بعرف اكره حتى عمرو اديب ورزان مغربى مش عارفه اكرههم رغم انى بقول انى بكرههم عشان بيخنقونى

نفسى اعرف انا جايبه العند وتقفيل الدماغ احيانا يعنى منين ؟؟؟

نفسى أعرف هو انا طبيعى انى لسه بحب الكليه برغم تاريخى الرائع معاها اصحابى المقربين عارفينه ولسه عندى امل فيها ولسه ولسه ولسه

رغم ان المفروض أبقى مش طايقها دا طبيعى ولا صناعى يعنى ولا ايه عشان انا كده خطر على الامن القومى

وبدأت أشك فى قواى العقليه

انا كتبت مره على احد الكتب

مش عاوزه اكرهك انا بحب المهنه جدا بس بجد بكره المؤسسه اللى هى الكليه

توقيع

واحدة كانت بتحب كل شبر فى الكليه

طبعا رومانسيتى الفظيعه مع الكليه ديه حقيقه

يلا خير لو حد عارف يبقى يقول بقى

وبمناسبه الكليه نفسى أعرف العيال اللى كانوا فى دفعتى السنه اللى فاتت كانوا فاكرينى ليه بنت العميد او السكرتيره كانوا على طول بيسألونى على حاجات مليش دعوه بيها وفاكرانى دحيحه ليييييييه؟ منها لله القعده قدام والنضاره مفيش حاجه جابتنى ورا اللى الحاجتين دول عشان كدا لا عدت بقعد قدام ولا بلبس النضاره ولأ بيشوفونى الا فى الامتحانات اولمناسبات الرسميه

نفسى أعرف أنا ليه بقيت بنسى بسرعه ومش بنسى غير الحاجات اللى ماما تقولها

نفسى أعرف الطفلة جوايا امتى هتكبر وتعقل شويه وتعرف ان الزمن لا يعود للوراء .وتعرف ان احساس رقم واحد فى قلب بابتى مش هيتكرر مع حد الا زوجى ويبقى يقول غير كده انا عاوزاه يقول غير كده

اجبار ان لم أكن رقم واحد فى حياته مين غيرى طبعا محدش يقولى الدعوه هتبقى رقم واحد عشان منتخانقش خناقه كبيره وأضيع فيها رقاب

لأن لا أتحدث بمقارنتى بالدعوه ماشى انا بقول أهوه

نفسى اعرف ليه دايما بحب أغانى الأفلام اللى أغلبها مش بتفرج عليه ؟

نفسى أعرف دايما انا وايمان عاطف (الكلام ده على الفيس بوك)عاملين زى توم وجيرى واحنا فى الحقيقه مش بنتناقر كتير كده وخصوصا لما نبقى فى نوت عند الناس ؟

نفسى أعرف الكلام الكتير ده جبته منين

بس عموما بالهنا والشفا وللحديث ممكن واحتمال يكون فى بقيه

دمتم بحب وهو هيخلى الدنيا تمام التمام

ولاء عبد الحميد رزق

من أمام الكمبيوتر الكائن فى حجرتى المبجله

فى جو من الهدوء المريييييييييييييييييع

وجمبى مج النسكافيه اللى خلص وانا بكتب النوت