أحساس بجد

فى البدايه عايزه اقول ان كل واحد فينا ليه حاجات حلوه فى حياته وبيتعلق بيها وبتوحشه لما تغيب عنه ويغيب عنها.انا دلوقتى مع المدونه بقيت كده بقت بتوحشنى اوى وفعلا بحسها انا هى وهى انا .محدش يقول ا ن عاشقه الاقصى المذاكره اثرت عليها..لكن صدقا جميل اوى ان الانسان يبدأ يبقى عنده شعور كده مع الحاجه اللى يمتكلها.يعنى مثلا تلاقى الواحد بيحب القلم بتاعه اوى لانه عشره عمر.مثلا البيت بتاعه الكمبيوتر بتاعه كده يعنى.لكن الشعور الحميمى بينى وبين المدونه حاجه تانيه خالص.صدقا جزى الله خيرا من كانوا سببا فى تدوينى.المهم انا جايه انهارده اكتب بقالى كتير ما كتبتش.طب هأكتب عن ايه ولا ايه ولا ايه؟

بعيدا عن كل مايحدث على الساحه.بعيدا عن كل شئ قد حدث فى مدينتى الحبيبه.لكن فيه شعور اول مره احسه او يمكن كنت حاسه من زمان ومش قادره أعبر عنه.ان لقيت ان فيه علاقه بين اسمى عاشقه الاقصى واحداث الاضراب فى المحله.استنوا بس بدون تريقه ولا استغراب.فى البدايه لما اطلقت على نفسى هذا الاسم كنت حاسه انه الاقصى دا غالى على كل مسلم اوى يستحق ان احنا مش بس نحبه بل نعشقهه ويفضل اسمه ملازمنا طول حياتنا وبجد بحس بأحساس بالعزه وانا بكتب هذا الاسم الذى اتمنى انه يبقى اسمى الحقيقى.وكمان انا بحس ان البقعه دى غاليه اوى علينا كلنا برضه كمسلمين .احساس حلو اوى انك تحس بالانتماء للاسلام مش بس لارض واحده اللى هيا بلدك لا تحس بالانتماء الاسلامى لكل بقعه مسلمه انك تطلق اسمك على اسم هذه الارض فدا مش فضل منك ولا شرف لهذه البقعه لكن شرف ليك انك ربنا يوفقك لذلك.طبعا السؤال اللى كلكم بتفكروا فيه وطب وايه بقى العلاقه بين عاشقه الاقصى والمحله.هأقولكم احساس الانسان الفلسطينى وهو بيشوف بلده بتتخرب وبتتهدم وبيحصل فيها الافاعيل تقدروا تقدروا الاحساس ده احساس صعب اوى.طبعا اللى حصل عندنا مش زى اللى فى فلسطين لكن احساسى وانا جايه المحله يوم الخميس وبشوفها وكأنها ثكنه عسكريه واثار التخريب باينه يخلى الواحد يقول يااااااااااااااااااااااه احنا زعلانين اوى على اللى حصل فى مدينتنا وبجد من قلوبنا حاسيين بزعل لان المكان ده احنا كبرنا فيه واتربيبنا فيه كل مكان لينا فيه ذكريات كتيره جدااااااااااا.ذكريات حلوه وذكريات مؤلمه لكن مكان بنحبه لو حد مسه بحاجه بسيطه بنزعل.انا مش بتكلم بمثاليه بس بجد انا بوصف احساسى قلت لنفسى ياااااااااااااااااه دلوقتى حاسيين الاحساس ده وامال الفلسطينين بيحسوا بأيه ارضهم بتتخرب وكل حاجه عندهم بتتدمر ويرجعوا يبنوها عايشين دائما مترقبين.احاسيس كتير اوى هما حاسوها وعانوا كتير ومرابطين فى ارضهم.عارفه انى لسه ما اوضحتش العلاقه اوى.الاعلاقه ان انا بعشق الاقصى وربنا يرزقنا الاخلاص فى القول وبعشقه جدا كمان.بس دلوقتى حسيت يعنى كلمه وطن وارض. كان عشقى للاقصى مجرد احاسيس ومشاعر اصلى ماشوفتش خراب هناك فى المكان اللى انا عشقته مهما شوفنا صور عن فلسطين مش هنقدر احساسهم ممكن نشاركهم الاحساس لكن نحس زيهم صعب.دلوقتى بعد ما حسيتى ان حد خرب ولو شويه فى مدينتى وبلدى حسيت بجد يعنى ايه عاشقه الاقصى

دلوقتى عشقى زاد للاقصى ولبلدى.وياريت كل واحد يحس فينا يعنى ايه كلمه وطن كبير اوى يجمعنا كلنا بمختلف جنسيتنا ولونا وبلدنا

وطن اسمه حضن الاسلام

الذى احلم ان ارتمى فيه

ويجمعنا من بعد الشتات

لان اللى احنا فيه من بعدنا عن اسلامنا

بحبك يا اسلامى وبحبك يا اقصاى وبحبك يا مدينتى وبلدى

وبحب كمان مدونتى

لكم تحياتى

عاشقه الاقصى..