Wednesday, April 30, 2008

يوم متهندس ع الاخر


امبارح وبقرار مفاجئ الى حد ما قررت انى انزل مع صديقه عمرى وانتيم الطفوله البشمهندسه منى لكليه الهندسه اللى انا وهى فضلنا نحلم ندخلها سوا.وف الاخر وبعد تانيه ثانوى دخلت انا علمى علوم (سبحان الله)محدش يسألنى له فى خلقه شئون اتقلب تفكيرى ساعاتها ليه 180 درجه.المهم ودخلت علاج طبيعى وهيا دخلت هندسه.المهم صحيت بدرى على غير العاده وروحت معاها .اول ما وصلت الكليه قابلتنى اخت ليه برضه كان بقالى كتير مشفتهاش وسلمت عليا وحضنتنى باشتياق وحب عمرى ماحسيته بجد كان لقاء حلو اوى.بعد كده شوفت كليتهم.هيا مش وحشه شغاله يعنى.عشان بس منى والاء مايزعلوش.ودخلت معاهم محاضره وياريتنى ما دخلت قالولى دى رياضه.وع اساس انى كنت بفهم رياضه وبحبها فى ثانويه عامه كان عندى امل افهم حاجه.والله ماعرفت افهم كلمه مع ان شكل الدكتور كده بيشرح كويس.قعدت اكمل قصيده كنت بدأت كتابتها فى المحاضره لحد لما خلصت الحمد لله على خير.بجد كان يوم حلو اوى .نسيت اقولكم اتعرفت على اصحاب منى والاء فى الكليه.وبنات زى العسل اوى

وشوفت اصحاب ليه كان بقالى برضه زمان ماشوفتهومش.يااااااااااااه ذكريات ثانوى واعدادى رجعت اتذكرها تانى


كانت ايام جميله.المهم قضينا اليوم طبعا كان لازم نأكل مع بعض.وقعدنا نتكلم ونضحك وبعدين رجعنا الحمد لله البيت


كان يوم بجد فعلا من احلى ايام عمرى.بس ماشوفتش كل اصحابنا اللى كانت منى عايزه تعرفنى عليهم.بس بجد كان يوم حلو اوى


مقالتلكوش واصحاب منى كانوا عارفيين منها انى بقول شعر فاصروا يسمعوا منى

هما والله اللى اصروا


بس كان يوم حلو اوى


كليه الهندسه دى هيا اللى اتخرج فيها المهندس خيرت الشاطر


كليه ولاده والله


بكل المقاييس اليوم كان تمام وان شاء الله اتكرم عليهم مره تانيه واروحلهم تانى


ياااااااااااه اللحظات الحلوه بتعدى بسرعه



المهم


ان خلااااااااص الامتحانات دقت الابواب

وبالفعل امتحاننا كام امتحان عملى اتظبطنا فيهم


والشفوى الاسبوع الجاى


تبرع ولو بدعاء


عشان الماده اللى جايه مايعلم بيها الاربنا


اكيد مش هبقى متابعه المدونه اوى


بس مش هأخد هدنه جامده

لانى مش من انصار الهدنه


مع انى والله نفسى اجربها


المهم


نسألكم الدعاء




عاشقه الاقصى


.

4 comments:

Anonymous said...

ايام الجامعه دى حاجه تانيه خالص
وانا حزنت جدا لما قرات كلامك ده
لانى تذكرت اخوانى فى جامعه المنصورة
كان دايما اخوانا الى اتخرجو يجو يزرونا
وكان يقولو لنا ان الايام دى مش ممكن تتعوض
مكناش حسين بكده
نفسنه نخلص كليه باى طريقه
ودلوقت نتمنى نروح ولو يوم واحد الكليه
المهم أنا دلوقتى حزين جدا جدا جدا

walaa rizk said...

هو فعلا ايام الجامعه لا تتعوض وخصوصا بصراحه انا بحاسه ايام عندنا فى جامعه القاهره.لما بنعمل اى مسيره او مؤتمر بتبقى حاجه تفرح بجد

وطبعا جامعه المنصوره من الجامعات اللى يتزعل على فراقه
ومعلش انا اثرت احزان حضرتك
جزيت خيرا على المرور

أبو نور الدين said...

إيه اللون الغريب ده إنت ناوية تعمينا أنا على ما خلصت الكلام كنت إتحولت
بس هقول لك ولا يوم من أيام الكلية
إحنا أه كنا بنذاكر لما تطلع عينا
بس أحلى سنين العمر

أبو نور الدين said...

معلش تعليق بسيط
هو حضرتك شغالة فى شرطة المرافق؟
كل واحد يكتب حاجة تقولى له شكرا على المرور شكرا على المرور
أنا خايف أدخل أعلق بعد كدا تسحبى الرخص بتاعتى ههههههههههههههههه